Өндірістік операциялар барысы

Мұнай өндіру

2017 жылдың ортасына қарай «НКОК» компаниясы қауіпсіздік талаптарын сақтай отырып, мұнай өндіру деңгейін іс жүзінде тәулігіне 200 000 баррельден астам шамаға жеткізді. Жүйені жүктеу деңгейі (өндіріс сенімділігі) болжанған көрсеткіштерден асып түсті. Шикі газды кері айдау жұмысы басталып, ол оңтайландырылған сайын 2017 жылдың екінші жартысында мұнай өндіру көлемін тәулігіне 370 000 баррель деңгейіне жеткізу мақсатында қазіргі уақытта өндіріс көлемін арттыру жұмысы жалғасуда.

Компания мұнай өндіру көлемін арттыруды жабдықтар мен процестердің сенімділігін қамтамасыз етуге бағытталған және коллектор күйін ескере отырып дәйекті түрде қолданылып жатқан жоспарлы шаралары негізінде жүзеге асыруда. Өндірістік қауіпсіздік «НКОК» үшін әрдайым басты мәселе болып қалады және бұл ретте ешбір ымырашылдыққа жол берілмейді.

Шикі газ айдау

Шикі (күкіртті) газды сынақ мақсатында айдап қарау жұмысы 2017 жылдың жазында басталды. «НКОК» компаниясы жүйелерді сынау жұмыстарын жалғастыруда және Қашаған кен орнында мұнай өндіру деңгейін арттыру мақсатында қойнауқатқа газ айдау көлемін бірте-бірте арттырып, оңтайландыратын болады.

«НКОК» компаниясы акционерлерінің көптеген елдерде өндіріс жұмыстары-ның түрлі жағдайларында күкіртті газ айдау жұмыстарын жүргізу бойынша мол тәжірибелері бар. Бұл технология алғаш рет 1989 жылы Канадада әзірленген болатын, ал 2002 жылға қарай ол әлем бойынша түрлі елдердегі 39 жобада, соның ішінде Қазақстанда орналасқан Қарашығанақ және Теңіз жобаларында қолданыла бастады.

Түрлі елдерде газ айдау саласында жүргізіліп жатқан жан-жақты зерттеулермен қатар Оператор жобалау кезеңінде компрессорларды бірнеше рет жоғары қысым ықпалында сынақтан өткізді. 2017 жылы өндірісті пайдалануға беру алдында компрессорларды қосымша кешенді сынау жұмыстары жүргізілді. «НКОК» компаниясы бұл технологияның Қашаған кен орнында қауіпсіз қолданылып жатқанына сенімді.

Күкіртке қатысты жұмыстарды ұйымдастыру

Құрамында күкірт мөлшері жоғары газды өңдеу, сонымен қатар күкіртке қатысты жұмыстарды қауіпсіз және тиімді ұйымдастыру жоба үшін өте маңызды.

Жоба бойынша күкіртті газды кері айдау жүйелерін пайдалана отырып, қойнауқатқа күкіртті газдың 80%-ға дейін айдау көзделіп отыр. Қалған 20%-ы «Болашақ» мұнай мен газды кешенді дайындау қондырғысында қарапайым күкірт түріндегі жанама өнім ретінде түзіледі.

Жоба жүзеге асырылатын мерзім ішінде орташа алғанда қарапайым күкірттің жылына шамамен 1,1 млн тонна қарапайым күкірт (күніне 3 800 тонна күкірт) өндіріледі.

Күкірт белгілі бір нарықтық құны бар және оған деген сұраныс өсіп жатқан тауар болып табылады, сондықтан жоба акционерлері өндірілген күкірттің барлық көлемін сатуды жоспарлап отыр. Күкірт өткізудің халықаралық нарықтары Қытай және Жерорта теңізінің батыс бөлігіндегі елдер болуы ықтимал, бұл елдерде күкірт ауыл шаруашылығындағы тыңайтқыштарды өндіруде шикізат ретінде пайдаланылады.

Сондай-ақ «НКОК» компаниясы қазақстандық және шетелдік институттармен бірге күкіртті құрылыс саласында және жол салуда пайдалану мүмкіндіктерін, сонымен қатар Қазақстанның тұздылығы жоғары топырақтарына арналған тыңайтқыштар компоненті ретінде пайдалану мүмкіндіктерін зерделеді.

Күкірт Батыс Ескенедегі арнайы жүк тиеу терминалында теміржол вагондарына тиеліп, теміржолмен өткізу нарықтарына тасымалданады. Күкірт тек уақытша ғана сақталады. Күкірттің ыза су қабатына енуіне жол бермеу үшін күкірт сақтау алаңы қорғаныш төсеммен және дренаж жүйесімен жабдықталған. Алаңның бүкіл периметрі бойынша өрт пен газ анықтайтын құрылғылар орнатылған.